話說同村有一條樣衰怪，佢個未來女婿以前放狗唔拖實，走黎搞我，但個未來女婿仲走黎打左我一把！阿爸想打鑊佢架喇，不過佢急速逃走同扮聽唔到，所以俾佢走甩左；但個樣衰怪過左幾分鐘竟然走黎同阿爸道歉，仲話自已個未來女婿有D精神問題，叫阿爸算數，阿爸叫佢年紀不少同埋大家住埋同一條村就算。自此之後，阿爸無次見到呢兩條友仔都雙手叉腰，企定定啤實佢地，呢兩條友見親阿爸都運路行。
其實我地住得村屋仲要係地下果層，都預左要清理埋門口D垃圾，但最近唔知邊隻死狗成日係我地門口痾屎痾尿，要阿爸阿媽執都夠衰，仲俾D村友以為係本小狗既所為，本小狗出左名夠清潔架嘛，食左死貓無聲出真係谷氣；可惜捉唔到兇手，唯有忍住忍住，繼續用我既靚樣擦下班村友鞋先。
事發
尋晚阿爸阿媽返到屋企，係門口企左好耐都唔開門，我都知梗係有人係外面架喇，跟手就聽到阿爸叫個樣衰怪清理返D狗尿，係條樣衰怪隻金毛既所作所為，都OK大督喎，唔怪得陣味咁壓啦：
期間阿爸發現好多村友望左出黎，佢只好大聲向D村友解釋自已係等緊一個無公德心既人放完狗返黎，清理返D污糟嘢，自已並唔係賊仔。
等左十五分鐘，阿爸發現條樣衰怪鬼鬼竄竄咁由另一個方向出現；佢係俾阿爸捕住既情況之下唯有死死地氣行返屋企同返落黎清潔。
我聽到阿爸話唔該佢清理返D狗尿，條樣衰怪話大家同村唔駛咁下嘛，又唔係有咩仇口；佢講到仇口，阿爸就記得呢條友以前點恰本小狗。。。。
條樣衰怪清理完後阿爸無放過佢；阿爸話：你既然識講大家住埋同一條村，就唔該你有D公德心，大家都知道狗主要負責清理自已既狗既便溺！
條樣衰怪竟話：我有呀，平時都有，係今次唔記得之嘛。
阿爸話：係咩？你有鬼！有的話平時呢度唔會咁多屎尿啦！搞到呢度壓到死！
條樣衰怪話： 我有，下次我放狗駛唔駛叫埋你出黎呀？證明俾你睇！你唔好行咁埋呀，你個口就壓！
阿爸話：好呀，等你。你幾多點？聽日黎㩒我鐘 （兩個小朋友嘈緊交？！）
條樣衰怪話： 你唔好唔黎呀，屎忽鬼！
真係好似小朋友嘈交，咁大個人。。。不過阿爸高佢半個頭，用個心口對住佢塊面講嘢，佢都仲夠膽還口，我都幾佩服佢有咁既勇氣。
高潮
係阿爸諗住夠俾走人既時侯，我聽到同屋二樓有個男人大叫：你個X樣唔好走呀，又係你，我落黎打X你，你唔X好走呀！
跟住聽到開口聲，再聽到有好多人由二，三樓跑落黎，原來包租公幾兄弟出黎幫拖。一個，兩個。。。。好似周杰倫首歌咁，總共有五，六個大漢衝左落黎，指住條樣衰怪怒罵，嚇到佢好似米高積信咁Moon Walk向後退。
鬧佢既內容唔太方便寫哂出黎啦，原來大家都忍左呢條樣衰怪好耐，亦都話過佢好多次，都係D狗屎狗尿既清潔問題咁。佢唯有死狗道歉，話對唔住，我以後唔會架喇（呢一刻我好懷疑佢係低能架，道歉都唔駛好似小學生咁架嘛？）
但好奇怪，呢條樣衰怪又唔衰得，其中一個大漢最後鬧埋佢最後一句果陣佢竟然還口，難得阿爸仲幫佢解圍，叫佢即刻收皮返屋企訓覺，否則真係有好戲睇。
結局
阿爸返到入屋，同阿媽講話呢鋪嘢爽度為百份之一百！但以後若果發生同類事件，阿媽千祈唔好出黎，因為果一刻連阿爸都有D驚，試想像下突然有咁多人衝落黎鬧交。。。。
阿爸話好慶幸自已有咁型既鄰居，亦希望條樣衰怪受到教訓；同埋發覺原來呢個世界仲有人咁有正義感。本小狗其後亦都問過條樣衰怪隻金毛，佢話佢老細精神有D問題，叫我地原諒佢喎。（咁好明顯佢成家都係咁，要睇醫生了）
謝謝閱讀。
以上故事為真人真事；所有人均以理性同合法方式解決問題。相信呢類故事每日都係香港發生不知多少次，解決方法就係站起來！及希望正義朋友及時出現在你身邊。
沒有留言:
發佈留言